股神畢菲特旗艦嘅股東大會上，竟然出現一位「過氣超模」。咪以為佢好似某啲香港𡃁模，着浴巾去海旁影相嘅動機一樣，出嚟博上鏡抽水，因為以佢今時今日嘅地位，根本唔需要。
現年49歲嘅超模Kathy Ireland，上年被《福布斯》評選為全球最有米超模，身家達3.5億美元（約27億港元）。佢發達絕唔係靠老公科水，而係靠自己打天下。17歲入行做model，幾年後就晉身超模行列，之後開始做生意，開公司kathy ireland Worldwide，身兼創辦人、總裁、首席設計師。生意仲越做越大，目前旗下產品有1.5萬種，由家品到婚紗都有，整個零售王國市值20億美元（約156億港元）。
人會老，樣會殘，花瓶係做唔到一世嘅，喺「外表」以外，做女人一定要搵到自己強項。Kathy由超模變富豪，已經完全證明世上的確有女人係又靚又叻。不過，最令菲菲佩服嘅，係佢結婚25年，育有一子兩女，目前同醫生老公仍然恩愛非常。
Fifi
本欄逢周二、四刊出