阿里巴巴上月底以45.7億元，入股新浪微博18%，阿里創辦人馬雲身為微博用家，被指個人微博已經有一年半冇更新，既然自己都唔常用，點解咁睇好，拎幾十億出嚟入股？
婚姻比喻阿里再上市
馬雲上周六喺美國接受訪問時就澄清，話一直都關注同用緊微博，唔鍾意絕對唔會投資，佢仲預告，個人微博好快就會更新，呢幾日「琢磨」緊寫乜。查實好多名人嘅微博內容都被傳媒拎去用，馬雲出名多金句，的確要諗清楚寫乜，寫得太平淡會令好多人失望。
好似佢講完微博，講阿里再上市，竟然用結婚做比喻，將阿里比喻為一個「結過婚又離過婚的人」（指子公司上市後私有化），因此明白婚姻比結婚更重要。
佢唔在意喺邊度或者幾時結婚，只關心婚姻能夠維持幾耐、有幾美好，最擔心結婚後，婚姻會成為愛情墳墓。咁又係呀，投資者最怕認購咗隻新股之後，股價潛水，咁咪跌入新股墳墓囉。