上周六係西甲巴塞隆拿中場法比加斯26歲生日，佢同大自己12年嘅富婆女友丹莉娜喺屋企開P大宴親朋，隊友美斯同碧基都有帶埋女友到場賀老友牛一。法比仔仲得到佢波砵贊助「豹牌」送嘅波砵蛋糕，呢個26歲生日特別開心！
波砵蛋糕賀26歲
雖然近期係咁傳法比仔，下季可能重投英超阿仙奴嘅懷抱，不過呢位狂牛兵日前一於少理，喺西班牙嘅屋企開生日party，仲請埋美斯同佢女友安東莉娜，仲有碧基同歌手女友Shakira到場。法比牛一呢啲咁值得高興嘅日子，又點可以唔影相留念呢？安東莉娜都不停同人影相，仲upload上instagram同twitter，同班球星粉絲分享慶祝朋友生日嘅喜悅。
丹莉娜送咗咩禮物畀法比仔就冇人知，但係「豹牌」見旗下人氣最強嘅球星生日，當然要送件大禮過佢啦。呢個德國運動品牌，就專程搵人做咗個生日蛋糕，送到法比仔屋企。法比加斯一向唔多post相，都好畀面咁影低個蛋糕，然後upload上instagram，多謝呢份咁特別嘅禮物。認真識做。
路邊野花挑逗美斯
另外，有傳話美斯喺生日會當中，有美女上前挑逗佢。真係唔知邊個咁唔識死，安東莉娜在場都夠膽搞阿根廷球王。不過，美斯同女友咁好感情，又點會理呢啲路邊野花呢？
