前日港甲護級鬥到最後一刻，峯迴路轉下最終大埔降班；乙組聯賽噚日亦煞科，賽前已篤定冠軍嘅元朗就好正氣咁以3:1贏咗同愉園、東方沙龍爭緊升班嘅大中，東方就2:0贏沙田，趕上升甲組嘅尾班車，下季同元朗、愉園2支老牌球隊重返甲組。
煞科戰本安排同時進行，當中元朗同愉園分別以3:1同5:0贏咗大中同花花，不過，最後邊隊升班都仲要睇因為場地問題，遲咗成個鐘開波嘅東方對沙田賽果。東方憑李思明同姚學文上、下半場各建一功贏2:0，佢哋最後以20戰42分排第3，喺08/09球季申請自降丙組後，經過5季終於打返上甲組。
「左倫右李」唔會出山
東方教練兼球員嘅李健和，就對球隊順利達成季前升班嘅目標，冇特別興奮；反而過百名專程到場打氣嘅東方躉就好開心。雖然唔能夠好似上季咁全勝升班，但重返甲組始終都高興。東方今次升班更加有晒長遠發展，難怪班fans開心到扯旗繞場，又拉橫額同東方Angel合照留念。
45歲嘅和哥賽後話：「因為啱啱先攞到升班資格，下季組軍方針要同老闆、贊助商傾吓。我同歐偉倫等老將就肯定唔會復出，要搵有經驗嘅華人同外援，重新組織過隊波；至於自家培訓嘅青年軍亦未係時候，等佢哋跟住甲組操先，睇吓兩、三季後可唔可以擔正。」和哥仲話，想香港球市蓬勃，唔係靠幾支傳統球隊重返甲組就得，而係要靠球會努力，點樣提升水平，先至重要。和哥唔踢，佢嘅囝囝嘉華就有機會跟球隊上甲組，嗌開和仔嘅球迷，下季改口叫華仔喇！
區隊來季資助增至100萬
至於老早攞到升班資格嘅地區隊元朗，賽前就收到好消息，民政事務局局長曾德成喺網誌話，下季甲組區隊資助額由55萬增至100萬元，以用喺教練同器材等開支，亦會增加球隊免費場地節數。屯門總監盧光中回應，政府增加區隊資助固然歡迎，惟此金額當然唔會滿足，更唔會因此而提升來季班費擴軍。
