可愛嘅巨鴨瘋魔全城，禮義廉即時本住「蛇齋餅糭」嘅黨最高原則，整番場「橡皮鴨一天遊」。灣仔區嘅禮義廉區議員李均頤近日貼出「蛇齋餅糭」告示，公告下月2日佢嘅辦事處會搞場賞巨鴨兼去流浮山食海鮮一天遊，位位120蚊。
行程先睇巨鴨，後食海鮮，之後唔使去投票站投票㗎。查實李均頤咁識撈，他朝唔撈議員，都可以喺旅遊界大展拳腳。不過，唔單止建制派借鴨宣傳嘅，查實泛民范國威都一樣，早前仲推出睇完巨鴨去食片皮鴨嘅「殘忍旅遊團」㖭。全港都「我為鴨狂」，有網民就怕怕，將巨鴨融入挪威畫家愛德華孟克嘅《吶喊》作品入面，表達港人上下均為巨鴨「吶喊」咁話。