港甲前日上演護級大激鬥，8隊波共4場賽事同時開打；當中晨曦喺完場前1分鐘以4:3反勝南華，最終令同日只能以2:2賽和橫濱FC（香港）嘅和富大埔降班；賽後有唔少球迷怒插「少林寺」造假放生晨曦，搞到南華足主羅傑承太太梁芷珊都忍唔住，噚日喺fb留下千字文呼冤（圖）。
羅太噚日喺fb留言回應，簡單嚟講就係港甲搞到最後一輪先知邊隊降班，每隊波都有責任，唔明點解大家要南華負最大責任︰「死貓，我不是啃不慣；黑鑊，已經孭過很多。而我的宗旨，一個人要有情有義，我會誓死悍衛（捍衞）南華中的每人，因為那些猜測都肯定不是事實。」羅太最後以《有誰共鳴》歌詞作結，暗示南華受屈，有誰共鳴？至於羅生噚日亦喺blog度強調球隊絕無hea踢︰「出現這樣的賽果，失望是必然，昨（前）日完場時，我直情覺得自己有點發燒，對球隊表現不滿及生氣到面都紅晒，太太叫我小心爆血管。」
此外，南區噚日喺「準爸爸」教練馮凱文帶領下，喺主場上演港甲煞科戰，雖然只與屯門踢成1:1，但賽後仍開香檳慶祝首次升班即奪殿軍。