開講有話，惡人自有惡人磨。真普選聯盟早前舉行首場政改研討會，俾愛港之聲踩場被迫腰暫；真普聯噚日舉行另一場研討會，愛港之聲繼續「畀面」參加，發言繼續大大聲質呢個批嗰個。之不過，噚日個研討會係「黃衫軍」人民力量主場，愛港之聲一開聲，即被噓爆，最後演變成兩大激進陣營互罵。不過愛港之聲今次人丁單薄，不單止罵戰敗陣，離開時又同身穿「調理農務系」T-Shirt嘅網民正面交鋒，俾人粗口指罵兼圍堵，最後愛港之聲嘅陳廣文要喺保安護送下，敗走緊急通道。人力又豈止對付愛港之聲呢，噚日民協廖成利、民主黨趙家賢以至衞生服務界李國麟等支持2012政改方案嘅政團人士都被黃衫軍輪流發炮狂轟，廖對人力譚香文講咗句「剃人頭者人亦剃其頭」，即被人力支持者齊聲要求道歉下被迫收回言論。