貪湯喺老廉做專員期間，豪飲茅台酒，又頻頻用公費同中聯辦官員食飯，佢嘅劣行，連長洲居民都睇唔過眼，喺今年嘅太平清醮飄色巡遊，決定將佢惡搞一吓，等佢成為巡遊第一男主角。
平安包加價至8蚊
八方噚日入長洲睇搶包山選拔賽，順便八吓今年飄色巡遊有乜嘢特別，有搞手同八方講，諗緊用財爺鬍鬚曾揸鑊鏟炒河蟹呢款造型，諷剌佢自稱係「中產」。中產同鑊鏟有乜嘢關係？都真係幾難明。有團體就將會整個湯顯明飲茅台嘅造型，諗住寸貪湯掛住同中聯辦官員應酬，亂花港人公帑。
長洲惠海陸同鄉會飄色總監黃成就話，前特首cheap曾其身不正，所以佢手下貪湯先至會亂浪費港人公帑，向高官大送禮物。
飄色明寸貪湯、針對中聯辦，長洲太平清醮值理會主席翁志明就話，中聯辦副主任林武同保安局副局長李家超今年都會到場做主禮嘉賓。
講番個搶包山選拔賽，有76名男女選手一決高下。前年冠軍張文翔以7.95秒最快極速登頂首名出線決賽。第八年參賽嘅長洲居民郭嘉明以第四名入圍。10.1海難救人英雄消防員梁俊傑和黃子翹都有入圍。舊年女子組冠軍蜘蛛女鄭麗莎再次參加，希望蟬聯。
好多人都會趁太平清醮買番個平安包，長洲平安包老字號東主郭錦全就話，今年麵粉來價貴咗一成，臨時工人工貴咗兩成，平安包要由舊年每個7蚊加到8蚊。
mailto:[email protected]
