【上環→澳門】孖仔組合Soler兩兄弟都結晒婚組織幸福家庭，大哥Julio仲做咗台中市長胡志強女婿㖭，前日中午12點45分，Julio同新婚老婆胡婷婷出現上環港澳碼頭，佢哋應該預備搭1點船返澳門探親，不過Julio個樣好心急不停咁打電話，似乎仲等緊人噃。
細孖遲大到
好在遲大到嘅細孖Dino同老婆黃麗施（Nancy）終於急急腳趕到嚟，Nancy孭住半歲大嘅混血囝囝Damiano，Dino就攞住大袋行李鬼咁狼狽，兩對夫婦會合後快快入閘，Julio全程同新婚老婆十指緊扣鬼咁sweet，搭自動電梯時仲玩咬耳仔，上船後胡婷婷仲為老公整理衣領，情到濃時更忍唔住撥弄老公頭髮，煙韌到爆。
相反，結婚3年幾嘅Dino夫婦表現得老夫老妻般，老婆掛住湊BB，Dino又要孭背囊又要手攞大袋行李，雖然佢一馬當先行上船，但都不忘逗囝囝開心，而啱啱瞓醒嘅Damiano眼仔睩睩好精靈，難怪咁得父母歡心啦。
採訪、攝影：陳辰、楊浩賢
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/