私駕路：七彩車身噴油　可以搣隨時改

夏日將至，一身打扮不其然會變得色彩繽紛，想愛車也齊齊換上螢光彩色新裝？Plasti Dip噴油不但色彩豐富，噴完還可以輕易搣走油漆，自己動手噴也不怕出界，隨時改色襯衫都變得輕而易舉。

記者：許維雅　

攝影：劉永發　

模特兒：Rika、Kenneth@GME

撕走油漆似玩白膠漿

希望愛車更有個人風格，近幾年興起車身貼紙的拉花裝飾，不過想變化更多端，自己又可以動手玩埋一份，各位車主可以一試這款來自美國的Performix Plasti Dip噴油。跟一般舊式噴油的最大分別，就是Plasti Dip油漆的獨特質料可於乾透後，令漆面變成膠膜，效果不滿意的話，可以隨時整塊搣起；另一好處就是膠漆可沿形狀邊緣撕走油漆多餘部份，感覺如兒時玩白膠漿一樣，不單止好玩又有滿足感，還令圖案色彩設計更靈活。今次Mini Pit找來一部豐田iQ作示範，噴上螢光粉紅輪圈、綠色頭唇及鏡殼、藍色車章及車頂直間拉花等，搶眼指數極高。細微如車名的一個單字也可以輕鬆上色，相信這方面，一般車貼及噴油就較困難才做到。至於保養方法，亦跟一般噴油無異，即使是啞面，也是防水防熱，耐用性高等都是它的賣點。

用煙熏黑效果的Smoke色噴了車章。$180

Blaze螢光系列應該大受年輕人歡迎。各$210

Metalizer金屬色系有金、銀、銅選擇。各$180

Camo迷彩系列最適合噴越野車。各$180

淺色蓋深色以白色打底

由於處理方法相對容易，Mini Pit負責人Joe哥都鼓勵車主自己買返去試吓噴，一支由$180起至$230不等，視乎不同色系。除了有螢光色，還有啞面亮面及迷彩系列。至於買幾多支？Joe哥以噴這部iQ的經驗供大家參考，兩個側鏡殼約三分一支、四隻輪圈約合共兩支。若然要噴上淺色遮蓋深色部份，用量便可能要多一點，Joe哥就提議大家先用白色打底，效果會更佳。

Plasti Dip噴油步驟

1. 搖晃噴油一分鐘，噴嘴跟車身距離約一呎，保持均勻力度以左右方向不斷噴上漆油。
2. 約十分鐘左右，再噴上一層。餘此類推，噴上三層的效果會最佳，最後等三十分鐘以上讓油漆乾透。