英冠喺上周六煞科，真係好睇過戲，12場比賽共有39球出現，不過，要講到最戲劇性嘅，就一定係侯城同埋屈福特爭聯賽亞軍，兼最後一個直接升班位嘞！因為如果唔係屈福特超黑仔，3個龍門同時揩嘢，同卡迪夫城攜手升班嘅，可能係佢哋而唔係侯城。
先講番由布魯士帶領嘅侯城，原本喺聯賽排第2嘅佢哋，榜首大戰迎卡迪夫城只要勝出，就唔使理第3位屈福特迎戰列斯聯嘅戰果，順利以聯賽2哥嘅身份升班。點知佢哋最後只能同卡城打和2:2，升唔升到班，就要睇屈福特嘞！
19歲𡃁仔騰雞失兩球
不過，由蘇拿帶領嘅屈福特仲黑，喺主場對列斯聯開賽前，正選門將艾蒙尼亞熱身時拉傷咗，要由2號門將莊拿芬邦特把關。最慘係邦特打咗廿分鐘多啲就勇戰受傷，屈福特逼住用年僅19歲，而且從來未喺英冠披甲嘅邦咸把關；結果邦咸騰騰震之下連失兩球，屈福特以1:2落敗，只得季軍，要踢升班附加賽。正由於邦特受傷時令比賽停咗成15分鐘，所以喺侯城場波一早完場之後，屈福特仲遲遲未完場，咁布魯士同一班侯城職球員及球迷，都要睇住電視直播，到佢哋知道自己終於升班後，都歡喜若狂，而布魯士更係自02年起，第3次帶領麾下球隊升班㖭！侯城下屆可以保住英超席位嘅賠率，就有2.1倍。