去年十月一日放煙花，港燈員工自南丫島坐船（南丫四號）出發往維港睇煙花，離開南丫島不久，與港九小輪嘅海泰號相撞沉沒，釀成數十年來香港最大海上死傷意外，有三十九人死亡。調查海難嘅報告書終於發佈咗，調查委員會痛批海事處，指海事處平時監管船隻不力，犯幾項疏忽：（一）有法不依，（二）全無紀錄，（三）私改數據，（四）粗略檢查，（五）輕率批核，（六）疏忽驗船，（七）隨意計算，不過以上「七宗罪」唔多唔少已存在多年，雖則抵鬧到極，但並非直接造成兩小輪相撞嘅原因噃，份報告有二百幾頁咁長，我地點搵到兩船直接相撞之直接原因呀！如果冇相撞到，即使兩船擦身而過，製造驚險鏡頭，都唔會引起死傷及引來調查委員會嘅唧，即係話，如無相撞，海事處啲蝦碌嘢可以繼續「保密」，外間無人知。
一位心水清老友睇完信報（五月一日）紀曉風專欄之後，得到靈感，在網上搵到報告第147段，專家證人（商船船長Captain Pryke）認為，「在十月一日下午八時十九分三十秒至二十分零一秒之時，在當時的情況下，如兩船保持航向不變，不會發生撞船，儘管兩船會以少於一錨鏈位的距離在相對航而上擦身而過，屬於不可接受的近距離相遇局面」，第148段講：「Captain Pryke認為，撞船起因是海泰號在八時二十分三十秒時向左轉變船向。海泰向左轉而非按規定向右轉，明顯違反規則第14 (a) 條。」
千錯萬錯，原來最錯就係雙方距離甚近時，海泰號不按規定向右轉，反而向左轉16度，同一時間，南丫四號向右轉了13度，咁講法，上到法庭，海泰號船長會處於不利地位。
呢位老友曾細心閱讀報告，皆因佢間公司擁有遊艇可供員工輪流借用，佢自己就借過隻船與親友出海，現在港燈已宣佈以後不會再辦員工海上活動，其他公司會點呢？老實講，坐公司船出海，係員工康樂福利之一，但一旦發生意外，公司點都會受到若干程度嘅影響，似乎犯不着。老友話：「我幾想公司維持番隻船，公司最高層要詳細研究份海難報告，再作定奪。」唉，高層都係打工仔啫，要負咁大責任就會諗到「多一事不如少一事咯」。