有時見到一啲好恨做大人，非常老積嘅小朋友，真係好想同佢調換身份，咁恨做大人，畀你做嘞！唔係話想換番啲青春呢回事，而係家陣呢個大人當道嘅社會，其實都係好似一個小朋友嘅世界，咁試問小朋友們，咁心急變大人做乜鬼啫。
五一勞動節這一周大家都好忙，強國人忙於奔走買黃金、巨鴨仔忙於在維港浮游、Iron Man則忙於飛天遁地、城市人忙於跟風加入海陸空派對，而大人同細路之間嘅口味越來越似，細路仔鍾意細路嘢，大人又係鍾意細路嘢，咁算係大人們大唔透幼稚吖，定係天真有童心呢？
照計應該係好事，成家人大大細細都有共同興趣，咁咪包冇代溝囉，偏偏呢又冇咁理想喎，大人玩嘅時候變細路，但係教細路時又變番大人，非常雙重標準噃，幾年前聽過一位小學校長分享：「我哋家陣教小朋友，其實唔係剩係教佢哋學術知識，反而係教佢哋如何應變獨立先重要，皆因今時唔同往日，正如10幾年前想像唔到今天互聯網橫行，睇youtube多過電視，咁我哋又點能夠想像10幾年後，小一學生畢業係咩時勢呢？與其硬塞死背，不如鼓勵小朋友活學獨立啦！」啱聽。
小朋友們，千祈唔好妄自菲薄，唔好以為小朋友就好渣，做咗大人就好勁。其實家陣大人除咗玩嘅嘢品味同你差不多，做事方式亦差唔遠。你識喊我哋都識，強國人為咗博啲零用錢，玩多兩日自由行，識得一哭二鬧call記者；你惡作劇我哋亦會，立法會入面為咗阻你上堂被阿sir鬧，一樣會學3歲仔撳電梯層層停；你識投訴隔離位過界香港人都會，一見到人踎喺地下踩鴨仔除細路條褲，香港人就好似叻唔切咁舉機告人，其實以身作則就夠啦，仲唔夠煩咩。
打波又係，呢排成日雨紛紛搞到封場就固然冇癮，有得畀你踢亦好易賴地硬或者賴地淋，總之輸波原因永遠唔係自己。最新人辦當然係巴塞教頭，唔出美斯就話係美斯唔願踢，自己成個苦主咁；一輸波就收起沙維同恩尼斯達，話畀全世界知我唔玩嘞，差在冇拉隊離隊腰斬啫。
小朋友，唔使心急變大人喎，根本上大人世界個個都係細路咁款，分分鐘幼稚過你。
keyman
now TV主持
mailto:[email protected]