【大坑】蜚聲國際嘅導演王家衛忙完電影《一代宗師》後，噚日凌晨12點，約咗一班朋友喺大坑嘅潮民火鍋店打邊爐。佢哋坐喺露天位嘆紅酒、食雪茄同吹水，不知幾咁寫意。不過最離奇係黑超唔離身嘅王大導，當晚竟然冇戴眼鏡，記者都差啲認佢唔到！唔知係咪飲多咗酒傾偈太大聲，騷擾到附近居民，凌晨1點幾，有警員埋去勸喻佢哋，王大導即刻同阿Sir講：「好，我哋靜啲。」
另外，王家衛今日會喺香港舉行嘅法國藝術節開幕活動中，獲頒法國文化界嘅最高殊榮藝術及文學司令勳章，由法國外長法比尤斯（Laurent Fabius）頒發。王家衛喺06年獲騎士勳章，今次可謂升呢一級。
採訪、攝影：李志明、彭琮然、朱志聰
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/