【RedMR甲組足球聯賽】4場港甲護級生死戰昨午同時上演，在5隊死1隊下，聯賽冠、亞軍南華及傑志，竟同時不敵賽前最危的晨曦及公民，一度「降班」的橫濱FC（香 港）補時建功，以2:2逼和10人應戰的和富大埔，令後者護級失敗。賽後不少球迷鬧爆有兩將領紅兼頻失機的南華，「放生」晨曦而連累大埔降班。
由於下游5支球隊都有機會降班，足總首次安排4場賽事同時上演，當中賽前護級威脅最低的太陽飛馬作客標準流浪，麥基連入5球，助球隊大勝8:2上岸。其餘3場卻充滿戲劇性，賽前包尾的公民對傑志，苦戰至81分鐘，由迪天奴頭槌二傳，隊長法圖斯近門建功，成功贏波出生天。
李康廉頻失機自責
賽前聲言要贏晨曦後捧盃影威水相的南華，在大球場迎戰晨曦，半場領先3:2；易邊後，晨曦更有中場楊賜麟被逐，怎知南華謝家強及文彼得之後接連領紅，形勢急轉即下，結果造就晨曦的夏志明及巴利近門建功，反以3:4不敵晨曦。
下半場錯失兩個單刀黃金機會的李康廉賽後顯得相當自責：「我們都想贏波捧盃，這些機會平時會入，但今日入不到，足球有時就是這樣。」苦笑捧盃的南華足主羅傑承賽後說：「無法取得圓滿賽果有點失望，對大埔最後要降班感到可惜。」賽後大球場有球迷即場狠批南華，指該隊連番失機及無故領紅牌，累到大埔降班。
本來形勢非太惡劣的橫濱對大埔，後者開賽6分鐘便由艾力士建功，可是這位射手其後領紅，橫濱其後扳平1:1，之後戰況膠着，如維持這個賽果，大埔便降班；補時大埔的安達禁區頂建功，以為可出生天，怎知橫濱最後一擊由福田健二頂入，就憑2:2的戰果，將大埔踢落乙組。
張寶春喊住插球證水準差
大埔護級失敗，教練張寶春賽後向過百名專程到小西灣球場打氣的大埔球迷道歉，稱對不起他們；張賽後聲淚俱下說：「球證補時3分鐘，結果補到4分幾。踢得不好，降班冇問題，球證一向都是香港足球的問題，今次亦令我們好失望。球員好努力，我們原有一線生機。」上半季不勝的晨曦次循環只曾一敗，最終絕境護級成功，每位職球員可獲超過1萬元獎金作獎勵。
此外，南區今午2時30分迎戰屯門，為今季甲組聯賽的煞科戰；乙組聯賽今午2時則舉行最後一輪，當中東方沙龍對沙田（九龍仔運動場）、大中對元朗（元朗大球場）及愉園對花花（青衣東北）同樣關係升班資格。本報訊
大埔Fans有嘢講
大埔Lu Lu
（2010年開始做大埔足球寶貝）
「可能大埔真係冇運，上場對晨曦都係補時失分，今次又係咁。就算降落乙組，我都會去睇，繼續做大埔Lu Lu，有過球隊叫我過檔，但我唔會應承。」
葉先生和女兒
（捧大埔4年多）
「個女咁大我就捧足大埔咁耐，輸波冇問題，但要公平，上次大埔對晨曦，球員冇傷冇事都補7分鐘，今次又係咁，對方球員犯錯球證唔罰，淨係吹大埔，唔公平嘛。」
文先生（右）/李先生（左）
（捧大埔1年多/兩年多）
「鍾意大埔係啲球員一向拼勁十足，有heart，今日完全係輸球證。以前南華降班，因為佢哋係大會，有人挽留；我哋大埔係細會，又冇錢，預咗降班，但會繼續支持。」
