高海寧（高Ling）近期在電視劇中的角色逐漸轉型，但昨日回復性感女神身份到旺角鬧市宣傳法國品牌手機，穿了藍色中空透視裙的她，露出三吋事業線，猶如心口有個勇字，面對現場逾百名圍觀者，場面極墟冚。
雖然高Ling的媽媽在MK旺角女人街擺檔，佔主場之利，但她到旺角仍然提高危機意識，即使酬勞有五位數字，她亦不敢穿得過分性感。對於近期苟芸慧和岑麗香因有緋聞令工作量大增，高Ling似要以性感收復失地，她笑言：「咁我都要傳吓緋聞喇！其實緋聞、工作量大增會好辛苦，佢哋都好努力，希望大家都關注佢哋嘅工作多啲。」
高Ling早前隨「獎門人」曾志偉到日本拍外景，對於有指同行的Mandy Lieu和金剛傳緋聞，高Ling忍不住爆料：「金剛確係好有紳士風度，加上Mandy識國語，佢哋都好好傾。」
體驗七級半
至於今次外景，高Ling透露玩了一個遊戲，要去一間地震房，感受了七級半地震的威力，她笑言：「當時要着西裝褸、背心喺房裏面化妝，化妝期間突然遇上地震，我哋要做避險動作，匿落枱底，真係好勁呀！郁嚟郁去㗎！」跟她去年在《反轉三周1/2》中坐錢嘉樂車上飄移跌胸的一幕如出一轍？高Ling笑說：「係呀！好似呀，哎吔，我都要返去睇片，睇吓有冇事先。」
採訪：楊潔雯
攝影：黃偉雄
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/