真心朋友不需時刻見，偶爾遇上便會有說不完話題，露雲娜（Rowena）與賈思樂（Louie）正是這樣的一對。「失去的昨天，她不願懷念」但為了好友，Rowena嘴巴不能再休息，決定復出與Louie在舞台上來一次「Re U」，尋回失去的星光或雷電。
撰文：李珮洳
相信很多人對露雲娜最深刻的印象就是卡通片《千年女王》的主題曲，而對賈思樂最深的印象應該是《蝦仔爹哋》。09年Louie本來邀請了Rowena擔任其音樂會嘉賓，可惜女方覺得未準備好再踏舞台而拒絕，幸而她突然以神秘嘉賓身份現身，嚇了Louie一跳，正是當晚一曲《Endless Love》令大家更懷念Rowena甜美的歌聲。
回想09年的音樂會，Louie說：「當時我見到台下有啲女觀眾聽我哋合唱時抹眼淚，即係我哋嘅歌聲真係打動到人心，嗰次之後出嚟嘅報道都好正面，大家都好想聽番佢唱歌。」
原來當時Rowena對自己沒有太大信心，她說：「話晒咁多年冇唱，加上女性點都好注意自己外形，我真心覺得各方面都未ready，所以Louie叫我做嘉賓時我第一時間say no。點知當佢開騷嗰晚我喺屋企個心好唔舒服，諗起個好朋友呢一刻做騷咁緊要，我係咪真係要去支持，所以最後一刻都去咗。」
連環食檸檬
之後Rowena與陳奕迅合唱《講男講女》，很多人以為她準備復出，連Louie都有同樣想法，所以他完成《蝦仔爹哋》舞台劇後便提出一齊開騷的構思，怎料結果同樣是食檸檬，他說：「佢啱啱唱完首《講男講女》，唱歌把火應該撻着，點估到佢答我唔好啫，我一心以為佢會答應我。我咪同佢講你個人都好矛盾，明明好鍾意唱歌，但係又唔肯出嚟唱，如果你唔唱真係好可惜囉，觀眾會有好大損失。」
話雖如此，但Rowena起初沒有被打動，不過最終被身邊這位好友用了蠱惑招數令她心軟，她說：「佢咪三日唔埋兩日打嚟問我點，間唔中就問我ready未呀？又成日讚我狀態好好，佢真係好識捉我心理，最後俾佢問得多讚得多，我都覺得自己ready啦，咪答應咗佢開騷囉！」
難覓主辦商
正當收到好消息時，Louie又面對另一困難，原來他親自向不同主辦單位敲門，可惜全都不願幫他們舉辦演唱會，他說：「嗰時周圍問人有冇興趣幫我哋兩個搞騷，五到六個主辦商都話冇，搞到我都冇晒信心。好彩我係教徒，覺得今次係個天畀個test我，搵唔到咪hold起先囉，點知有一日貴人就喺身邊自動出現。」
Louie口中的貴人就是多年老友盧敏儀（Money），他續說：「有日同佢食飯，佢問我有乜搞，我咪話想搞騷但搵唔到人投資，Money就話幫我問佢老公，件事就係咁樣成功咗，所以好多嘢係冇得強求。」聽到Louie細說找主辦單位一事，Rowena面上帶點愕然說：「點解我完全唔知㗎？我真係唔知你做咗咁多嘢。好彩我真係有答應你做呢個騷，唔係我真係會好後悔。」
此時Louie以哥哥口脗並拍拍Rowena說：「呢啲你唔需要知，我唔想你擔心，總之你嘅工作就係上台同我開開心心一齊唱歌就夠㗎啦！」朋友應該就是心照不宣！
場地提供：如心艾朗酒店
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/