記：《蘋果》記者
徐：廉政公署執行處前副處長徐家傑
記：湯顯明多次自批超支飯局，你有何看法？
徐：件事係非常不幸，規矩，總有規矩，（開支）總有上限。但作為一個高級官員，你要出去接待外賓，外交總有啲公認嘅國際通例。我哋出去訪問人，之後啲人回訪，大家所接受嘅待遇、宴請、酒店、官階都要對等。
講到接待規格，同大陸比，香港永遠都係輸。我91年訪問北京、廣東檢察院，住五星酒店，食嘢放咗三層碟，有一次食金箔。呢個風氣我唔認同，但個別人士鍾意用酒作為一種社交工具，呢個係好難避免。
離開政府後，有次我去山西，有位公安廳廳長請食飯，佢吊緊針，塊臉藍色㗎，仲飲五糧液、竹葉青，60度㗎，個人剛剛喺醫院出嚟，可能佢唔飲直情生存唔到。咁我哋香港唔希望有呢個文化囉。
講番湯顯明，佢係有疏忽，但值唔值得令廉署受咁大損害？我覺得係唔對稱！其實呢個（酌情）權係應該有，你做到咁高官，接待外賓，你（搞外交）有目標嘛，（飯局）超咗額，當然𠵱家450蚊係不合時宜啦。你超額咪超額囉，食完返嚟補個公文畀特首辦，咁咪OK囉。如果連呢個酌情空間都唔畀佢，咁邊有官威呀？做官冇官威，係做唔到㗎，尤其是頂級嗰啲，要對外面㗎，唔係只係對市民。
記：飯局超支分單，又如何看？
徐：嗰啲單一張拆兩張單，我絕對唔信佢（湯顯明）自己做，可能係員工幫佢解決問題。拆單係造假賬，應該有人受罰，但罰到乜嘢程度呢？紀律定點呢？因為呢個冇私人利益存在。呢個係壞文化，但喺現實中，可能每個部門都會有。整件事係不幸，唔可以接受，但係咪要令到成個香港起哄，令到廉署聲譽破產？我覺得唔得囉，我哋要理性啲去處理呢個問題。
記：如何看廉政專員被指帶女友用公數去中聯辦飯局？
徐：你唔知中聯辦有冇邀請佢攜眷參加。如果攜眷參加，咁香港、外國對男女伴侶自由度高咗，好多冇法律登記，但大家知佢係「阿太」，呢個可能都係外交策略喎。我哋是否認同，呢個見仁見智，因為社交就社交，返工就返工。
好多人一聽到中聯辦就覺得係魔鬼，唔好接近。中聯辦一啲官員，我覺得討厭㗎，唔適宜留喺香港。但廉署同中聯辦接觸，如果係私人同佢哋卡拉OK飲酒，我覺得係錯；如果係工作關係，我覺得冇問題。我哋有廉署存在，係中國嘅希望。咁中國咁大，每一個地方，都有需要向廉署取經。咁要接待，省、市、自治區，要去香港學嘢，咁要經過中聯辦。
記：但要湯顯明招呼中聯辦20多次？
徐：要深入了解每次目標，外交有好多層次，有戰略目標。你話佢全錯，唔啱，全部啱，又係武斷。
記：廉署辦公室藏酒，是否太過份？
徐：呢個係錯嘅，唔可以將飲酒文化帶返去部門。如果佢鍾意健身，係辦公室整個健身室，呢個好，因為職員可以用。酒，我覺得唔啱。
記：你認為，這是否現實版《寒戰》？
徐：有冇政治目的，我唔敢講。我只係覺得，政府搞咗個大頭佛出嚟。呢啲咁嘅做法，英國人好清楚。當時每次搞一啲咁嘅「運動」，清理好、西廠打東廠好，佢唔會畀佢失控，會計晒威脅、破壞力去到邊度，幾時收科，可能得到、失咗乜嘢，全部有評估㗎。政府今次應吸取教訓。
我相信，好多人想打擊廉署，因為佢自己本身唔爭氣，搞到調查員坐監、搞到搜七間報館，林炳昌搞咗六年，嗰啲案係造出來。其實廉署內部係失控，點令廉署做番合情、合理執法機構呢？
話似《寒戰》，係因為開始時可能係一、兩個人開戰，但之後有好多人參戰，參戰者各有目的，有啲想針對某個人，有啲想個職級做嘅嘢，有啲人想針對某個部門；裏面有人放風，想燒咗某啲人，希望從中求變。有啲議員加入戰圈可能想爭取曝光，有啲想燒吓中聯辦、燒吓廉署。𠵱家發展到好亂。
記：若你是湯顯明，你會如何拆彈？是否支持立法會調查？
徐：好彩我唔係。我幾同情佢，亦覺得佢幾活該，佢咁嘅職級，太唔小心啦。我做唔到佢咁高，我act（署任）過咋。其實件事唔係咁大，但時代變咗啦，傳媒攻擊性強咗、市民知情權熱烈咗好多。
如果我係佢，我第一時間會考慮出嚟講說話。你咪話，我係一個官，係鍾意杯中物呀，你哋唔鍾意，我冇辦法，我係用呢樣嘢作為一個社交工具，我一樣做到嘢呀。你講乜嘢都得，人都走咗咯。
但你唔面對，一定係特權法或者刑事調查。公務員咁高職位，面對問題唔出來解釋，咁呢個乜嘢政府嚟㗎？如果用特權法查呢件事，好戲在後頭。
mailto:[email protected]