【綠籬行動】
中國海關總署今年2月展開綠籬行動，加強抽查及嚴格執行廢物進口的規定，主要針對未達標及禁止進口內地的固體廢物，還有被稱為「洋垃圾」的舊服裝、生活垃圾等。
以往「隻眼開隻眼閉」
香港環保廢料再造業總會會長劉耀成表示，自內地推行綠籬行動，本港塑料回收運作基本上已完全停頓，「內地向來規定，膠樽一定要經破碎工序成為膠粒才可以進口，但以往本港回收商只係將膠樽壓扁打紮運上內地，內地會隻眼開隻眼閉接收，但自『綠籬』行動後，完整膠樽一概視為生活垃圾，所以無得入口。」
劉耀成稱，由於內地停收膠樽，所以屬會近400間回收商會員已停止回收膠樽及塑料，「清潔公司可能會因為回收公司唔肯收，惟有將膠樽丟落堆填區」。他們已聯同業界去信政府反映問題，但至今政府沒有正面回覆業界「求救」。
劉續指，全港僅有少數公司擁有「碎膠」設備，「據了解，我哋總會只得我一間公司，會將膠樽經破碎後再運去內地，所以我並無受到『綠籬』行動影響；另一間係仁愛堂，佢喺屯門環保園有個社企，會將廢塑膠分類後拿去破碎，甚至再提煉成膠粒原材料，所以佢都可以進口返大陸」。
安記老闆羅耀荃稱，他們已將較乾淨的膠樽免費送予回收商，但沾了飲料的膠樽只能丟棄。
《蘋果》記者