【台北】荷李活紅星韋史密夫（Will Smith）同埋個仔積頓（Jaden）前日到台灣宣傳新片《末日1000年》（After Earth），佢哋兩父子首度訪台，即吸引幾十名粉絲喺松山機場接機，兩父子好識做同影迷簽名，冧死粉絲。而佢哋今次留台4天，據知花費超過260萬港幣。
韋哥兩父子訪台表現得好親民，見到酒店門口有唔少粉絲等候，佢哋都冇刻意走後門，仲對簽名合照等要求來者不拒。而14歲嘅積頓噚日下晝趁老竇喺酒店做訪問，就即刻撇甩老竇，喺友人同保鑣陪同下到台北市政府後方廣場玩滑板，積頓仲着上自家潮牌MSFTS REP，眼見有記者追訪，佢仲即刻大獻「豚跳」絕技，雖然動作略嫌生硬，但都吸引唔少途人欣賞。
韋哥愛同粉絲互動
此外，韋哥父子噚晚喺台北信義區舉行粉絲見面會，之後再喺台北101進行點燈活動。而事前保鑣先喺活動現場視察環境，因為韋哥愛同粉絲互動，所以保鑣方面就要求大會將星光大道嘅紅地毯由60公尺延長到100公尺，等粉絲可以親近韋哥。
撰文：林妃
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/