【上環】早前歐陽震華（Bobby）入ICU搶救，報稱係因為急促進食嗆喉導致急性肺炎，不過又有人話佢係因為飲得過量所以酒精中毒，點都好飲酒都係點到即止就好嘞。好番出院嘅Bobby上個月同無綫劇組上咗佛山，拍攝新劇《情逆三世緣》，又撞啱內地H7N9禽流感，好在佢都冇事安全返港。
懶理禽流感
前晚9點幾Bobby趁住《情》劇唔使開工，揸住架豐田四軀車帶埋老婆傅潔嫻，約咗一位男性友人到上環尚興潮州菜館食飯。尚興係名人飯堂，除咗好多達官貴人鍾意幫襯，周星馳更加係常客經常喺度開餐。
據聞，Bobby佢哋要咗馳名嘅凍蟹、滷水併盤同埋完全唔驚禽流感嘅鵝片，幾個人一邊食一邊吹水，不過死過翻生嘅Bobby就滴酒不沾，餐飯食到差唔多11點，Bobby兩公婆負責埋單，同位男性朋友喺門口道別之後，仲順便同影相嘅記者揮手打招呼。當Bobby行去攞車嗰陣，從後面望過去明顯瘦咗一個碼，兩公婆上返泊係門口架車就離開。
採訪、攝影：楊浩賢、徐錦池
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/