競爭事務委員會成員名單，在四月二十七日公佈，唔知點解，以左丁山睇過咁多份報紙，只見蘋果日報報道得最詳細，詳列各成員姓名及背景，其他報紙點解略過不提，似乎側側膊就算呀？唔通對競爭事務委員會不予重視，認為冇料到？幾奇怪也。
蘋果訪問湯家驊議員攞反應，湯家驊話委員會內不乏反對競爭法人士，但未見支持競爭法人士，感到驚奇。左丁山對湯家驊之言，感到驚奇就真。反對競爭法不遺餘力，以失敗告終嘅獅子山學會行政總監王弼話唔知湯議員講乜，因為成員之中，港大法律學院助理教授鄭建韓過往大力支持競爭法（全世界嘅律師都贊成甚麼都立法嘅啦，原因唔使多講），科大商學院院長鄭國漢教授支持梁振英競選特首，亦支持競爭法，前浸會大學經濟系教授曾澍基素來唔係市場派，傾向競爭法立法，其他人例如商界議員梁君彥對競爭法立法，抱無可無不可態度，成班委員對競爭法恐怕係強烈贊成者多，強烈反對者少，中間睇風派最多，湯議員呢次睇差一皮咯。王弼對新加坡競爭法有更多認識，據佢所知，當地根據競爭法而控告商界之對象，以中小企為主，控告本地巨企絕無僅有，佢相信他日香港大致相同，其中原因好簡單啫，巨企有龐大法律、會計及營銷團隊，遇上任何「競爭投訴」，必然可以應付，政府即使硬碰硬，亦未必撼得贏，反之，中小企隨時矇查查中招，俾啲競爭法律師捉個正着，而中小企又未必有錢聘請專家團隊代為辯護，梗係容易成為犧牲品啦。
同日宣佈之市建局幾位新成員（非執董），亦係只得蘋果以較大篇幅報導，七位新成員就係蔣麗芸、馮煒光、何永謙、林智遠、黃遠輝、李律仁、周光暉，全部係梁粉或親梁人物，張震遠不惜違反六年滿任之常規，「捱義氣」做完六年主席之後，再做兩年先至讓賢喎，睇嚟新主席會在這七位新成員之中選一位。梁振英任用梁粉，左丁山唔反對，現實政治就是如此，唔通奧巴馬會委任共和黨人做主要委員會職位咩。問題係梁營有幾多人才啫，如果來來去去都係嗰班人，就證實梁營缺乏人才可用，幾難率領香港前進。