如果講網上hit rate去衡量呢啲稿嘅價值，我想自己以後唔應該寫英冠，因為自己有統計，條題講英冠一定少2、3成人次，相反係英超大名牌曼聯同利記，內文中唔中到都好，起碼先「呃」到你睇；但係，自己嘅睇波核心價值係英國衝撞波好正，英超唔興，好彩英冠仲大行其道，而且賭波要贏非為多人睇咁單純，自己王牌聯賽欣逢今晚煞科日，重心決捧老牌球會森林同保頓供同好。
同愛隊阿仙奴一樣，小弟久未喺擂台嘗過做1哥滋味；上周二靠英冠僥倖製造到last day drama，嗰種喜悅同公司賺到錢有分紅一樣咁高興。嗱住呢個幸運聯賽，配合本欄幸運隊保頓，今晚喺煞科日迎黑池，贏到就好大機會趕到尾班車，踢緊接嘅升班附加賽；始終主場王鬥風流波黑池，贏面自信極高。即莊家喜歡煲明天馬壇盛事冠軍一哩賽，引投注額，好多人會撐旺人羅神嘅「軍事攻略」；我會捧大摩另兩匹三班馬「醒目精伶」、「同個夢想」，各自精采。
無論升唔升到班，保頓應獲頒發英冠下半季飛躍大獎，開季後到去年10月尾由費列文掌帥位，由下游低見排到20位，去到𠵱家第6，對得住太公婆有餘；上次作客到已提早升班嘅卡城言和，一定收貨，要攻都留番今次喺地頭鬥黑池。隊波講過係主場王，近8次錄得全勝兼只失3球；更慶幸對手黑池上次主場打敗打比郡後已護級功成，今次嚟到銳步球場收爐漫無目標。
波友唔好忘記黑池前次南下1:6慘敗予另一肯定踢到附加賽嘅白禮頓，隊波內在問題嚟到季尾荼蘼或唔少，坦白啲講，恩斯同其他踢波巴閉、教波水皮嘅曼聯名宿沒有兩樣。嫌主W偏熱，狠啲博2.45倍[-1]。
另一選、現排後保頓1級嘅森林更老牌，亦喺今年2月翻兜前帥、有帶過該隊踢升班附加賽嘅比利戴維斯後，一度連掃6W重燃升班希望；可惜之後稍沉，靠上仗小勝米禾爾「吊命」，𠵱家要靠保頓有差池，而森林主場必要掃低今年大跌watt，由1、2位跌到8哥嘅李斯特城，方能踢到附加賽。森、李兩軍俱不能和，精采可期，可惜冇直播睇。但戴帥賽前為戰將減壓，贏唔到附加賽入場券，戰將也應為下半季表現自豪；科威特財團兜兜轉轉下搵啱人教，主場贏波謝幕，今季升唔到咪下季，可博上盤。
再博，阿仙奴今晚深夜大炒已篤定降班嘅昆士柏，上次鬥曼聯唔想輸，今次冇得再留；對手昆士柏上次鬥雷丁表現極肉酸，今季英超贏最多足智彩「其他」波膽嘅兵工廠，要博多啲得球季尾計數，今次係最後機會！
（下次見報日期：11/05）
蘋果波神