公民黨陳淑莊Tanya舊年場talk show非常成功，今年佢單拖添食搞多場，叫做《講女烈傳貳之出得嚟環》，擺明係講佔領中環、西環治港呢啲政治嘢，順便幫推動智障兒童福利嘅勵智協進會籌款。Tanya場騷下月13至16日先至喺藝術中心上演，但噚日個記招就多得藝人杜汶澤幫拖，阿澤仲有料爆㖭呀。
街上重遇 Tanya唔認得阿澤
阿澤先爆司儀柳俊江大鑊，話兩人喺網上認識，事緣有次柳爺喺網上問泰國好去處，阿澤就介紹啲邪骨嘅地方畀柳爺，點知柳太發現，仲話「杜汶澤吖嘛，出晒名㗎啦」，令柳爺啼笑皆非。
跟住阿澤又講起同Tanya嘅淵源。原來兩人10年前已一齊佔中，不過係「喜愛夜蒲」嗰種，話說有次喺酒吧經黃毓民介紹下認識，阿澤話當時自己係古惑仔一名，識番啲律師好緊要，即使眼見花名「四眼陳」嘅Tanya相貌平庸，但心諗對方係律師，係咪都要認識吓，後來知道Tanya唔打刑事案，於是咪少咗交往囉！直至多年後Tanya參選立法會，阿澤喺街上撞到Tanya派傳單，不過Tanya已經唔認得佢，搞到阿澤有啲灰。
噚日阿澤除咗現身力撐Tanya外，仲送咗隻近日熱爆嘅鴨仔畀Tanya，𠱁得Tanya好開心。上次Tanya着婚紗做騷，今次相傳會更加少布，不過詳情係點，Tanya大賣關子，只係話除咗佔中外，亦會講吓感情事。如果大家想買飛睇騷兼做善事，今日開始有得買啦。
mailto:[email protected]