米高佐敦退休多年，熱潮從未減過，除咗佢嘅AJ系列，就連喺1月尾發售嘅MJ Figure，都吸引大批球迷排隊搶購，網上一度炒至近5,000蚊；嚟緊主辦單位就會同本港波鞋網站HK-Kicks再度合作，推出123套（全部共500套）新嘅限量版（圖），睇怕又會爆hot！
今次呢套限量版figure，MJ會着上白色公牛主場波衫，仲連埋96年Final章，加上全套啪鈕衫褲，腳下更加係從未公開發售嘅AJ XI Bred，連地台都係特別製造，認真到爆。fans可以登入HK-Kicks網站，跟足指示like咗HK-Kicks嘅fb，再喺Instagram分享個人嘅MJ珍藏，就有機會用2,388蚊，買到呢套夢之人偶。
講開佐敦，佢唔止figure同波鞋搶手，就連球員卡都好值錢。早前佢大婚之喜，Upper Deck就幫佢出咗張限量1張嘅巨型卡，上面仲有唔少名宿簽名同祝福字句，真係畀足面。