【銅鑼灣】鍾鎮濤（阿B）前日俾女友范姜掉低做湊仔公，負責照顧鍾家三位小姐包括大女鍾嘉晴、二女鍾懿同細女鍾幗。前日約4點鐘，阿B帶住細女去到銅鑼灣利園二期嘅Bape Kids行街買衫，兩父女到咗冇耐，大女嘉晴就帶住鍾懿同老竇會合。
囡囡愛香蕉池
店入面放咗類似畀細路仔玩嘅波波池，池入面放滿一大堆塑膠香蕉。冇小朋友唔鍾意波波池，阿B細女鍾幗都唔例外，一入到去就二話不說跳咗入池度玩蕉，二姐鍾懿嚟到都玩埋一份，阿B喺旁邊一派慈父模樣望住兩個女玩。大家姐鍾嘉晴就負責幫細妹揀衫、鞋同咕𠱸，嘉晴頗有生母章小蕙買嘢嘅眼光，好快就幫兩個妹妹揀好晒。
呢個時候，阿B再次慈父上身，先抱咗細女離開香蕉池，放佢坐喺梳化幫佢綁鞋帶試鞋，試咗前後差唔多15分鐘，兩個細女已經急不及待行返入香蕉池玩，阿B就攞住戰利品去櫃位畀錢，之後就帶住依依不捨香蕉池嘅囡囡離開。
採訪、攝影：彭琮然
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/