近年經常爆出豪門爭產風波，信銀國際今年2至3月委託港大做調查，訪問咗510位40歲以上、淨資產逾100萬元嘅「百萬富翁」，竟然發現有67%冇提早分身家。照咁講，爭產未必只發生喺千億豪門身上，分分鐘幾百萬都爭一餐。
調查發現，六成受訪者認為預先分身家重要，因為可以按自己意思辦，唔使搞到後代爭產；其次先係希望屋企人嘅生活得到保障。大部份打算將家產留畀仔女，其次先至留畀配偶。
話雖如此，可能中國人都係棹忌講身後事，受訪者中，只得33%落實執行遺產安排。按民間智慧，預先分身家不外乎立遺囑，點知呢個調查話，最多人係買人壽保險，其次先係立遺囑，又或者同仔女或配偶聯名開戶口或買樓，萬一有事發生，身家就直接畀咗對方，原來佢哋認為，搞得遺產安排，最緊要程序簡單直接。