財演界又有嘢八！聽聞獨立股評人黃偉康（Andrew）最近蜜運中，對象係有線娛樂台一位年輕女主播郭志美（Kornee）。Andrew噚日喺電話度承認戀情，話「咁多次傳聞（曾傳過佢同前主播林燕玲拍拖），呢次最真，亦係唯一一次真。」
拍拖兩個月咋！
財演遇上娛記，看似風馬牛不相及，Andrew話，Kornee係佢喺有線娛樂台節目《今日觀點》做嘉賓時，經主播李潤庭介紹識嘅。兩人拍拖約兩個月。佢話Kornee本來做記者，4月開始做埋主播。
戀事被踢爆，Andrew例牌嗰句，「我想大家可以畀啲空間我哋，亦都希望可以專注喺我嘅事業。」佢最近就加盟文化傳信（343），做策略發展委員會總監，主要向公司提供發展建議，同時搞緊另一間證券行。