教宗又換人？由方濟換做方濟各？非也非也，3月獲選做教宗嘅阿根廷樞機貝爾戈利奧（Jorge Mario Bergoglio），揀咗13世紀聖人聖方濟各個名做稱號，華文教會以前多數用意大利文Francesco做繙譯，叫做方濟各；後來就用法文Francois嚟譯，叫做方濟，所以同樣位於石硤尾嘅聖方濟各英文小學同聖方濟愛德小學，其實都係講緊同一位聖人。新教宗當選後，天主教香港教區向神父發傳真，提示要統一用「我們的教宗方濟」，點知用咗個幾月之後，教廷噚日一錘定音，話要用番「教宗方濟各」，真係難為神父們又再改口。