立法會噚日晨早流流就流咗會，雖然一班保皇不力嘅建制派缺席議員，喺鏡頭前都苦口苦面話要道歉，但有知情人士透露，唔少建制派議員流會後，喺記者不能進入嘅宴會廳進入狂歡狀態，直言「難掩內心的喜悅」，歡呼可以暫時「放監」，回復自由身處理私務。
睇番噚日流會其間缺席會議嘅38位議員，最多人用嘅藉口都好大路，就係「塞車」，有多達10個議員咁講。其中民建聯葛珮帆似乎驚大家唔信佢，話塞車因為腸胃炎肚痛，搞到遲咗出門口，有政府中人聽到，都忍唔住笑咗出嚟。
大輝撐天后多過撐狼英
噚日全黨「杯葛」立法會會議，搞到立法會意外流會嘅政府盟友經民聯同新民黨，只有新民黨田二少企定定公開向市民道歉。
原先答應咗開會但甩底嘅經民聯發叔同鼠王芬，以及其他5位聲稱要開「重要會議」而趕唔切返立法會開會嘅經民聯成員，全日都未有現身立法會。
一早講明唔參加建制派更表嘅林大輝，噚日繼續發揮大師自由本色，晨咁早去咗元朗參加天后寶誕活動，都冇去立法會開會，話皆因個活動一年前已約好，睇來大師始終係忠於天后，多過忠於狼振英囉。