足球場從來都係是非之地，一班熱愛抽水嘅網民不時都會發揮創意小宇宙，整啲惡搞圖片恥笑敵對球隊或者可笑嘅事。巴塞隆拿周三歐聯喺主場俾拜仁慕尼黑大炒0:3，兩回合吞7蛋出局。網民又即刻出手，笑到巴塞臉都黃。
碧基慘變德甲logo
巴塞兩回合都俾拜仁炒，仲要一球都入唔到，網民見到點會唔拎嚟笑？頭號對象當然係今場有波入嘅後衞碧基啦，可惜佢唔係為巴塞破蛋，而係擺烏龍搞到球隊輸第2球。有想像力嘅朋友發現佢呢個Own Goal動作，同德甲logo入面個人仔似到十足十，將兩張圖拼埋一齊。有網友嫌唔夠過癮，直接將碧基key入德甲logo入面，問你死未？
美斯被收起，網友就連被雪藏嘅皇家馬德里門將卡斯拿斯都玩埋一份。惡搞圖入面個火柴人話佢兩個係神人，又點會俾教練收起，點知轉頭美斯同卡斯拿斯好無奈咁坐喺後備席，火柴人即時眼都凸埋，仲噴飯㖭！
拜仁首回合4:0打殘巴塞，第2場去到魯營球場hea住踢，巴塞就算和波都叫做唔使輸晒兩場出局；點知拜仁唔收韁，入多3球入決賽，仲唔係喺巴塞身上灑鹽？球迷見地上最強慘死，就即時加多幾腳，喺睇波之餘加多啲笑料，等足球多一種娛樂。