政府公佈3月份零售銷貨額，增幅為今年以來最慢。昨日同班潮人食飯，潮男一坐低，餸都未點就呻3月生意差了很多，大家諗住邊食邊講，潮男話飯都冇心機食，因為噩夢仲未完。剛過去的五一假期，各大商場不再人頭湧湧，Samantha罕有地感受不到大陸味。
名牌在強國銷售增長放緩，內衣品牌Victoria's Secret（VS）在零售勁吹冷風時登陸香港，摸頂的𤓓味甚濃！VS登陸亞洲不是新鮮事，早幾年已於珠江口對岸的路氹威尼斯人開張，但今次落戶中環和沙田，皮費貴好多，唔好以為沙田舖租平，呢個自由行重鎮，黃金舖位月租動輒近百萬元！
強勢登陸以為係食大茶飯，點知同澳門一樣，只賣配件及內褲等，VS迷最愛的bra竟然冇得賣，仲唔係人格分裂？簡直等同於肯德基在ifc開舖，但入到去發現竟然冇雞賣。某些外國品牌來港時，冇因應亞洲人身形改變剪裁，家陣仍在捱打，VS係咪諗住一注獨贏賣底底，已經足夠應付租金兼賺錢？
Samantha
本欄逢周三、五刊出