啱啱先喺禮拜日贏咗英格蘭球員先生同最佳年青球員嘅熱刺翼鋒加里夫巴利，噚日當選埋今年嘅英格蘭足球先生；而佢仲成為繼07年嘅基斯坦奴朗拿度（C朗）後，首個連擸3大個人獎項嘅球員，唔知會唔會好似C朗咁去皇馬呢？
繼承真路拿閃耀熱刺
23歲嘅加里夫巴利俾足球記者協會選為今年嘅英足先生，仲要喺5日內連贏3個人獎項，認真巴閉。今季佢真係表現出色，喺熱刺一個人打晒，聯賽上陣29場入19球，幫球隊排緊喺聯賽第5。𠵱家熱刺同車路士及阿仙奴，3隊爭緊下屆歐聯兩場入場券；如果佢連呢個目標都可以完成，今季就完美嘞。嚟緊禮拜六，佢將會代表熱刺倒戈母會修咸頓，家陣佢食咗鋪「大三元」，信心肯定大增。
得票率有5成3嘅加里夫巴利話：「我非常榮幸贏到由足球記者協會選出嘅英格蘭足球先生。呢個獎意義重大，因為喺今季英超，實在有太多表現好出色嘅球員。」加里夫巴利成為自99年嘅真路拿後，首個贏到呢個獎嘅熱刺球員；同時，佢亦係自85年嘅修夫賀（當時效力愛華頓）後，第一個攞到呢個殊榮嘅威爾斯球員。
勢成皇馬羅致目標
加里夫巴利補充：「好慶幸自己可以喺一支咁正嘅球隊效力，我欠隊友同領隊（波亞斯）嘅嘢實在太多，特別係領隊，佢好信任我。過去贏到呢個獎嘅球員都係屬於殿堂級，我可以同佢哋睇齊，確係感到非常光榮。」佢亦成為英足史上，第15個包辦英格蘭球員先生同足球先生兩大獎項嘅球員。話時話，C朗之前效力曼聯，喺07年連擸3項大獎，之後喺09年夏天以破世界紀錄嘅8,000萬鎊過檔皇馬。皇馬季初已睇中加里夫巴利，深信佢會喺球壇另一天王巨星；睇嚟佢哋有機會喺今夏出手，以超高價將佢帶到巴拿比奴球場，同C朗雙劍合璧！不過，波亞斯話管理層向佢保證，無論攞唔攞到歐聯資格，巴利都會留隊。