內地A股噚日先跌後回穩，二三線股就個別發展，但總算有嘢跑得出，選股難度亦減低。雖然形勢慢慢好番啲，但短期內都係見步行步，拉勻整個倉有得升就繼續keep住，然後mon實個市，有異樣先減持。
大路選擇方面，揸住強勢內房股照計唔會死錯人，至少keep得住跑贏大市。內房板塊從來繫於政策鬆緊問題，政策收緊就開始跌，跌到七七八八，阿爺亦唔會由得內房去死，鬆啲水等佢唞唞氣，唞氣期間就係蜜月期，股價係咁升。
內房股去年中開始嘅蜜月期過咗，但新「國五條」打擊樓市嘅消息亦浮晒面，冇乜額外不利消息下，內房股近期形成慢升狀態，喺港股未見大跌風險嘅同時，比較強勢嘅內房股應該可以跑贏大市。
終極目標價18元
噚日富力地產（2777）公佈營運數據，4月份合約銷售金額37.21億元人民幣，合約銷售總面積約33.16萬平方米，分別按年增長28.5%同59.7%；今年頭4個月，銷售金額126.03億元人民幣，合約銷售總面積約110.58萬平方米，分別按年上升32.3%及47.0%，表現唔錯。換言之，4月銷情未見放緩。廣州新「國五條」細則喺3月底出台，有影響但未至於嚴重打擊銷情，已經值得對佢樂觀番啲。
睇番盤數，富力過去幾年一直受到重債後遺症拖累，利息開支係咁升，蠶蝕盈利，但去到舊年盤數有番起色，盈利增長14%，股息率有5.26厘，股價亦回復上升動力。當然6.6倍嘅市盈率，係搭單有埋淨負債比率108%嘅高水平，風險偏高自然估值亦較低，不過，最重要係能夠走出重債拖累盈利嘅陰霾，未來基本因素繼續有改善空間。
由3月中旬開始，市場開始認為新「國五條」殺傷力冇預期咁大，富力股價就由低位11元升番去噚日14.16元，頗為接近年初高位。股價強勢得嚟，估值未止境，應該可以跑贏同業，現價吸納且戰且走，如果大市無風無浪，幾個月終極目標價睇18元。
晉佳
本欄逢周一、三及五刊出