周星馳嗰套《國產凌凌漆》有一幕，話大陸公安亂咁屈人，黃一飛臨俾人槍斃前，含淚講咗句，你哋屈人都要有良心呀，竟然屈個盲人偷睇國家機密。估唔到，呢種屈人事件，竟然喺香港嘅《文匯報》發生。噚日《文匯報》有篇題為〈梁繼昌劃清界線 撰文批「佔中」〉嘅報道，話會計界議員梁繼昌喺面書撰文，批評支持「佔中」及拉布者。查實呢，呢篇報道所引述嘅文章觀點，並唔係由梁繼昌所寫，而係另一位社運人士楊繼昌嘅文章。梁繼昌要求《文匯報》澄清道歉。不過八方認為，成件事最唔開心嘅，應該係本來寫呢篇文嘅「香港絕望」召集人楊繼昌囉！