前晚粵劇名伶白雪仙（仙姐）喺灣仔君悅酒店擺咗8圍預祝85歲嘅生日，娛樂圈中徒弟陳寶珠同埋好友好似汪明荃、唐鶴德（唐唐）、劉培基、倫永亮，而政界嘅前立法會議員劉千石、行政會議召集人林煥光、食物及衞生局局長高永文、前高官李麗娟、前任香港商務及經濟發展局局長馬時亨等等出席，加埋親友超過一百人賀壽，啱晒喜歡熱鬧嘅仙姐。
汪明荃直擊盛況
仙姐嘅朋友幫佢預備咗一個有花朵裝飾、兩層高嘅生日蛋糕，許完願切蛋糕時候，寶珠姐仲吻賀師傅，𠱁到仙姐好開心。汪明荃噚日喺微博直擊壽宴嘅情況，將好多相上傳去到微博分享，仲恭賀仙姐話：「今晚出席仙姐的生日飯局，非常熱鬧，親朋戚友100多人，仙姐86歲了，非常健康，犀利！恭祝仙姐長命千歲！」汪阿姐所講嘅86歲應該係仙姐嘅虛齡。另外，最吸引梗係壽宴嘅美食，真係包羅萬有，計有瑤柱燕窩羹、原隻南非鮑魚、脆皮龍崗雞呢啲貴價菜式。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/