（喜）利物浦喺周四發佈下季嘅新球衣，當中十分有啟示性，因早前發牙痕咬人嘅前鋒蘇亞雷斯（右）有份做新球衣嘅model，即係話佢留隊嘅機會好大。
發佈內，3位示範嘅球星除咗有隊長謝拉特同門將連拿外，仲有因早前於比賽中咬車路士後衞伊雲奴域而被罰停賽10場嘅前鋒蘇亞雷斯。由於新球衣銷售一向係球會嘅主要收入之一，所以球會都好注重邊個球員示範，下季會走人嘅，就梗係唔搵啦！如果呢個思維正確，即係話阿蘇留隊機會好大啦！不過，阿蘇成日因控制唔到自己而喺球場上闖禍，連佢嘅老婆蘇菲亞都睇唔過眼，下令阿蘇要改善形象，希望佢聽話啦。