前特首董建華家族旗下東方海外（316）有人事變動，做咗接近6年嘅財務總裁（CFO）Kenneth Gilbert Cambie另謀高就，6月拜拜。
任東方海外署理CFO
東方海外一時間未搵到人，決定由老董細仔董立新（Alan）署任。咁都啱，話晒家族生意，未搵到信得過嘅人，梗係由自己人睇數啦。
從家族生意嘅角度，Alan暫時睇數不無道理，但係佢好似冇乜財務底，佢喺普林斯頓大學讀政治系，獲頒文學學士學位，約25歲加入東方海外，做咗廿年，2005年開始成為執行董事。
老董大仔董立均較Alan年長3年，2011年先至開始做東方海外執董，較細佬遲。佢同細佬條路有少少唔同，雖然後生嗰陣都做過東方海外，但後來出去外闖幾年，開過科網公司，之後做過港龍航空營運總裁，2006年先正式返去打理家族生意。
佢亦較細佬低調，上月四川地震，就由細佬拎支票去中聯辦捐錢，佢亦係經濟發展委員會海運業分組召集人，照睇，細佬做生意之外，亦負責對外，董立均就主內。
佢哋阿叔、東方海外主席董建成今年初都講過，董立均無形中已經擔大旗。老董兩個仔咁幫得手，應放心晒，但阿仔要快啲搵番個長期嘅財務總裁囉。
李華華
mailto:[email protected]