英超車路士「爆炸頭」大衛雷斯，出名鍾意上網分享自己日常生活。facebook、twitter、instagram同最近興起嘅mobli，佢都有殺錯冇放過，實行玩盡各大社交網。呢位社交網達人日前又有新搞作，就係喺fb呃like送波衫！
45分鐘已50萬like
呢位26歲巴西後衞周二喺幾個網站post咗自己着住波衫嘅相，話如果fb有50萬個人like，就會送出身上嗰件波衫。呢招「如果夠幾多個like，我就乜乜乜」雖然已經俾全球網民用咗無數咁多次，但係本住「橋唔怕舊，最緊要受」嘅精神；再加上大衛雷斯強勁嘅人氣，球迷梗係受落啦。爆炸頭貼咗張相大約45分鐘，就出第2個post，拎住兩張紙牌，分別用葡文同英文話like數已達標，多謝球迷厚愛，爆炸頭號召力真係勁。
其實大衛雷斯人氣咁勁有原因，就係佢出post夠多夠親民，試過喺twitter自認手機不離手，所以成日都會update日常生活畀球迷知。鍾意喺自拍擺出「手指指」pose嘅佢，不時會分享自己喺屋企嘅相。佢間豪宅唔單止可以睇盡倫敦景色，仲喺客廳擺咗幾部遊戲機，完全係機迷世界。
爆炸頭上星期歐霸4強首回合一腳絕殺巴素利，喺面書又呃like成功，場內場外都係風頭躉，半日唔check佢啲社交網，真係out咗都唔知咩事。