【記者羅鈺歡報道】以前郵局只有郵差叔叔，2000年後卻多了女性加入，如今有30多個女郵差，「返朝八放午四，每年增薪，仲有時間照顧屋企做家務，又唔使驚裁員」。打了十多年銀行工的凌嘉寶（Mango）說：「只希望擁有屬於自己一段派信路，俾我派到退休。」
近年不斷有女性加入郵差工作， 1990年代只有數名女郵差，2000年後人數卻增加，到目前已有30多名女郵差。郵差現時的起薪點約為12,000元，資深可達20,000元以上。34歲的Mango中七畢業後，一直在銀行做文職，「喺商業機構工作每天都擔驚受怕，唔知幾時裁員，所以一直想搵份公務員工，夠穩定」。
六年前偶然機會下，她開始到郵局做兼職分信員，「大半年前正式見工時，有幾百人爭，但兼職經驗成為我獲聘嘅優勢。」
「每朝早返工就開始分信，要完成晒一日工作先可以放工。」她說，這份工還有個好處，政府免費提供名牌Rockport氣墊鞋。
「師傅成日話『派信不行回頭路』，因為郵差派信係順住路派的，派錯或派漏而返轉頭會好浪費時間同腳骨力」，所以即使她再熟路，每派一封信件，也會仔細檢查才放入信箱。
與街坊建立深厚感情
郵差的工作路段是終身制，行內人稱為「一生一段信」，Mango暫時為美林邨居民派信，入職短短大半年，已經與街坊建立了感情，「街坊都同我好熟，小朋友初時見到我會叫郵差叔叔，見耐咗已經改口叫我做郵差姨姨喇」。
派信雖悶，但等信的人卻各有故事。「其實每日見有人盼望自己嚟，感覺很開心，例如一到夏天，就會有好多學生企喺信箱前等大學派位信」。她從師傅的口中，也聽到很多關於派信的感人故事，「我師傅派信已有廿年，與住戶好好感情，今年新年，仲有個女住戶專登企出來等佢嚟派信，原來除咗想同佢講句恭賀說話外，再同佢講聲自己老公過年前走咗喇」。20年來派信，每天短短問候，彼此已建立了深刻的友誼。她憶述派信路上的故事，有歡笑也有流淚。
她已視郵差為終身職業，「呢份工OT有補鐘，放工後可以煮飯湊仔，薪高糧準福利好」。