《寒戰》想搵影帝周潤發拍續集，有傳佢會飾演幕後大奸角。劇本係點？選角如何？相信𠵱家仲未有定案。八方最近同憑《寒戰》攞到金像獎最佳新演員嘅廉署執行處前副處長徐家傑傾開，新戲仍未有太大進展，不過呢，導演同佢提過吓，可唔可以教吓發哥點樣做官。徐家傑話唔敢當，佢講笑話，發哥份人咁好人、咁和善，要做官，或者會有啲困難喎。咁又係嘅，家陣官場爆出咁多醜聞，真係面皮薄啲，都唔適合做官㗎。如果發哥真係喺套戲入面做官，唔知佢會做邊個部門嘅首長呢？劉德華都做過保安局局長啦，發哥嘅官位，斷估點都唔會低得過華仔啩？