滙豐控股（005）下周二（7號）公佈首季業績，跟住喺15號，舉行第二個三年期目標策略日，市場靜待滙控今次有乜新計捽靚股價之際，集團行政總裁歐智華，原來上個禮拜尾悄悄現身香港，逗留約一星期先走。
唔住大班屋 鮮有來港
歐智華一向唔鍾意做秀，今次照例冇公開露面，多數時間都喺滙豐總行入面開會，偶爾喺中環走動。歐智華其實好耐冇來港，聽聞佢今次主要見客，兼同內部高層開會，為首季業績同策略日做準備。佢太座都有陪同來港。
有別於前任行政總裁紀勤鍾意坐住私人飛機，全球巡迴搞員工visit，落分行巡舖畀傳媒影相，歐智華嘅作風超級低調、務實，唔單止唔住大班屋，近年仲全副精神放喺精簡架構、執違規包袱同捽靚股價，香港交到數，所以唔會成日嚟，即使真身抵港都冇乜人知，好多時，滙豐人都係喺獅子行等電梯或行過走廊，碰見佢先知道佢老哥駕到。
近日碰見佢嘅人都話，佢老哥好似又發咗福，但睇落心情好輕鬆，應該係心廣體胖。至於佢嘅左右手──集團企業傳訊聯席主管高沛賢，上周亦在港跟同僚舉行內部會議，仲早過歐智華走。
為人低調又唔等於佢沉默寡言，據聞閂埋門見客時，歐智華風趣幽默，見解獨到，聽過嘅人形容係如沐春風！
李華華
mailto:[email protected]