張家輝首部執導嘅電影《盂蘭神功》，下月就會喺大馬開拍，噚日喺柴灣做第一次宣傳。家輝仲同埋佢口中講嘅兩位「尤物奇葩」，即係劉心悠同埋依然風騷嘅吳家麗一齊出現，不過心悠BB嘅素顏就輸晒畀演家輝媽媽、着晒低胸裝嘅家麗姐喇。
做導演兼演員嘅家輝話老闆原本想佢拍警匪片，但家輝就想拍啲新穎題材，佢話：「呢部戲係一部好陀地，唔係扮發夢、發神經嗰啲合拍片，總之就係重口味同驚嚇。」搵得兩位尤物演出，唔知會唔會有激情場面呢？家輝笑笑口話：「當中除咗表現到佢哋嘅演技，仲會有啲全面性床戲㖭。」
家麗自爆撞鬼
心悠BB話有份演出受寵若驚，仲好多謝家輝當自己係本地演員，而家麗姐就話家輝第一次做導演當然要支持：「睇香港電影成長嘅我哋，𠵱家好應該貢獻番，拍番多啲畀𠵱家呢一代嘅香港人睇。」仲話當年拍鬼片疑似撞鬼，驚到不得了都要死頂開工。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/