小弟好高興可以喺《蘋果》同大家見面，希望以後每個禮拜都可以搵到隻好股畀大家。話晒都係頭炮，梗係要搵隻有權倍倍聲咁升嘅股票介紹畀大家──奇峰國際（1228）。
奇峰呢隻股仔本身係從事木業開發，一直以嚟成交唔多，不過近幾個月則動作連場，最新係喺4月頭大搞嘅天然氣項目，但大家可能走漏晒眼。
原來佢嘅合作夥伴係中船集團，呢間中船係超級國企老字號，而今次則係喺上市平台當中，第一次涉足天然氣業務。
根據單deal嘅內容，奇峰係同中船旗下一間叫中國工業成套物流嘅公司達成天然氣合作協議，為期10年，合作內容包括管道天然氣、壓縮天然氣（CNG）及液化天然氣（LNG）等；而奇峰就會成為中國工業成套嘅天然氣、原油及石油產品指定供應商，即係長期有大客包銷。
中短線目標0.76元
奇峰已搵到一個供應商，每年保證供應10億立方米天然氣，剛好係上市最大燃氣供應商昆侖能源（135）年銷量嘅一成，以剛剛起步嚟秤，規模唔算細，況且，仲講明往後會因應環境，再彈性增加。
計計數，昆能𠵱家最新市值超過1,222億元，而奇峰最新市值只係得20.5億元，如果按呢個比例，奇峰市值要追番昆能嘅一成，講緊已經係大約122億元，即係每股目標價係1.93元，以現價0.325元計，潛在升幅係超過五倍。
咁講或者大家可能覺得好誇張，但係睇番其他燃氣股，好似隻中油燃氣（603），2011年最低見過0.36元，今年最高位則見過1.62元，所以無嘢係無可能。
仲有一個關鍵位，係中船已經躋身為全球三大造船集團，而且更係殿堂級國企，今次搞天然氣供應業務雖則係初試牛刀，但絕對係一個重要里程碑，呢次合作，自然帶挈隻奇峰水漲船高。
正所謂好股識於微時，小弟建議趁低吸納，中短線先睇番09年個高位0.76元。
陳承龍
本欄逢周四刊登