【台北】台灣組合F.I.R.結他手阿沁雖然曾經喺演唱會上向主音女友阿飛求婚，可惜佢哋已經喺3年前分手，原來阿沁最近已經靜雞雞另結新歡「雞柳妹」，日前佢哋喺台北信義嘅威秀影城拍拖睇《鐵甲奇俠3》斷正，阿沁刻意戴口罩同帽遮掩，可惜食嘢時佢要除口罩，令佢身份曝光。
當日阿沁買咗雞柳條之後，同女友企埋一邊撐枱腳享受二人世界，阿沁親手餵女友食雞柳，仲要一條雞柳條兩份食，你一啖我一啖交換口水，煙韌到痹！佢哋醫完肚之後，就行去戲院等入場，阿沁仲好有男士風度，幫「雞柳妹」攞手袋，有愛情滋潤嘅阿沁發福唔少，條褲仲窄到激凸㖭，相反着短裙嘅「雞柳妹」一對腿都算纖長，個樣仲幾清秀㖭！
死口唔認拍拖
前日阿沁俾台灣記者追問新戀情，雖然有圖有真相，但阿沁依然死口唔認拍拖，死撐話「雞柳妹」只係「認識很久的朋友」，男仔都會互相「品嚐」食物，嗰日因為男助手唔得閒，佢先會約「雞柳妹」睇戲喎，至於發福問題，阿沁話因為日夜顛倒忙住做嘢，所以至肥咗少少啫。
撰文：林妃
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/