東亞銀行（023）主席李國寶前日喺股東會被一大班小股東同傳媒質問，點解要借6,000萬元畀前政務司司長許仕仁，搞到佢𤷪𤺧到面容扭曲，成個雷曼苦主咁，原來股東會後仲有小插曲，小股東用票表達不滿，有4.91%反對寶哥哥連任董事，成為十年來最高紀錄。
4.91%反對連任董事
翻查紀錄，寶哥哥2004年重選董事，反對票不足1%，2007年因捲入美國道瓊斯內幕交易案，反對票升至2.24%，2010年回落到1.34%。呢次借錢事件，竟然令小股東大動肝火，反對票升到4.91%。寶哥哥𤷪𤺧都無補於事，下次見小股東都係寬容啲，有事慢慢講啦。
講開寶哥哥，佢將中國海外（688）獨立非執董個位畀咗細仔李民斌，早前唔做東亞非執董嘅恒地（012）主席李兆基，一樣有鋪非執董世襲癮，將佢喺東亞個位畀咗大仔李家傑。