思捷（330）新CEO馬浩思（Jose Martinez），請咗三位同樣喺舊舖Zara工作過的主管過檔，意味班底正式更替，思捷踏入「Zara-ization」年代，唔係得個講字。朋友仔話，呢班前Zara團隊，肯由一線舖轉嚟Esprit呢啲十線舖，相信Jose花咗唔少錢，搞改革點可以冇自己友幫拖？呢一步點都要做。
Esprit最大的問題從來都係：1.啲衫設計唔掂、2.貴至少20%至30%。如今思捷請番Zara人幫手搞產品，第一個問題可能有機會改善，但最難搞其實係第二個問題。如果Esprit降價，一減以後都加唔番，思捷肯定唔想；佢哋𠵱家嘅策略，係希望改用多啲靚料，希望唔減價，同樣800蚊一條裙，都會令人覺得抵喎！聽落好似合理，但消費者其實好難察覺到。
另一個最大阻礙，就係批發業務。呢一part的客戶主要係歐洲老牌百貨公司，Esprit賣畀佢哋嘅衫為切合定位，非常老土，同Esprit形象背道而馳。批發業務似是一隻轉唔到方向的沉船，Jose喺零售方面的改革，就好似要重新造一隻救生艇出嚟，係咪追得切？執行風險，不可不察呀。
海迪