雖然睇親都鬧，不過依然有人睇無綫新劇《神探高倫布》，周一晚嘅收視有25點（161萬人），仲好過《金枝慾孽貳》（23點，148萬人）㗎，因為呢套劇被稱為cult爆神劇！已經升呢叫做《神劇高倫布》嘅《神探高倫布》，前晚一集講到變奸嘅包平安（敖嘉年）嫌自己智商唔夠高，逼腦科醫生換「布布」黎耀祥嘅腦細胞畀佢，搞到佢兩個由天台打到上天堂，鏡頭一轉有個雷劈落嚟，兩個「叮」一聲換晒衫繼續打，變成兩個有超能力嘅強人對打！有網民話激似《22世紀殺人網絡》，亦有人覺得似足遊戲game《街頭霸王》！
祥仔微博狂呻
不過，唔慣被批評嘅兩屆視帝祥仔，前晚忍唔住喺微博留言抒發吓感受：「感謝支持的朋友，每次演出對我都是一個寶貴的經歷，無論成敗，總可從中學習。得失不重要，能夠明白當中的過程，才是一生受用。」而敖嘉年噚日喺電話度話佢知好多人話鍾意呢幾場戲，佢認為總有人鍾意、亦有人唔鍾意：「我唔會氣餒，有人鬧即係有人睇，鍾唔鍾意都睇埋啦！」
版主：陳基征
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/