政府為向四川省政府盲捐1億元，明日再硬闖立法會財委會，但查實唔少內地人都贊成香港立法會要阻止今次嘅捐款。上周五人民力量黃毓民嘅「酒濃於水」發言，指貪官會挪用捐款來買幾萬蚊名酒，條片喺內地優酷網足足錄得逾132萬個點擊，逾35萬次轉載，仲喺微博上排首位，有內地網民話毓民嘅發言係「我們每一個人的心聲」，贊成立法會切勿盲捐：「希望香港不會給同化，香港民眾能堅定自己的立場。」
毓民喺發言中話不滿政府強調「血濃於水」，反指內地貪官係「酒濃於水」，會利用捐款買名酒Lafite，又話強國人來港淘空本地金舖，可見強國人「幾叠水」。毓民話，1億元實係杯水車薪，只係讓政府表態效忠北京，拒絕相信內地貪官之餘，更不任信特區政府能監察捐款。