鄰居魏力曾教菲菲，莊家股一係唔買，一買要一次過揀幾隻。咁無非係想分散風險，只要有一隻扑中，話知其他變晒牆紙都仲有斬獲。
對一項投資信心爆棚時，一注獨贏當然冇問題，但當形勢有變，及早換馬分散投資先係明智。好似濠賭業咁，過去一直充當強國黑錢「洗衣機」，生意越做越大；但自從阿爺話打貪，就多次傳出被整頓，令強國資金唔敢過大海。
好似金沙中國（1928）今次就醒，明知未來單靠呢班強國客做唔住，決定從良轉sell家庭樂，同夢工場動畫（DreamWorks Animation）簽功夫熊貓、史力加版權，到時到候喺金沙城中心整啲卡通show，搞啲主題房間，務求擴充酒店客源。
不過，就算分散投資都要揀啱地方。家吓金沙企圖喺金碧輝煌嘅賭場，放幾隻人見人愛嘅卡通公仔，令紙醉金迷嘅銷金窩變成老少咸宜嘅遊樂場，好明顯有啲不倫不類。再者，就算引到小朋友去，喺澳門睇完show，除咗食同瞓，仲有乜好做？
Fifi
本欄逢周二、四刊出